ချစ်သူသိစေ

နှစ်ပေါင်းရှည်ကြာ
ကြာလေမမေ့
လမ်းတကွေ့
မုန်းတမေ့မှာ
ချစ်တင်းဆိုခြင်း
မမေ့သည်.....

လွမ်းတပွေ့နဲ့
လှမ်းတွေ့မိစဉ်
ရင်သည်လှပ်ခုန်
သည်းရင်ဖိုသည်
ပီဘိဆယ်ကျော်
တစ်ဦးနှယ်.....

ချစ်ခဲ့ဖူးသော
နေ့ရက်များဆီ
တမ်းမိသည်လား
မရေရာအတွေး
စိတ်ကူးတွေသည်
တောင်တောင်အီအီ
ပျံ့လွင့်စိတ်အစဉ်
ထိန်းချုပ်ခက်လျှက်
နေနှင့်ရက်ရှည်
တမ်းမိသည်လေ.....

ချစ်သခင်သက်ထား
အခက်များပွေချင်
မမေ့ချင်ပါ
နေ့ရက်တွေမှာ
စကားချိုမြ
ကြားမိနေချင်
စိတ်အစဉ်သည်
ပျံပျံလွင့်.......

ကြင်နာမြတ်နိုး
ချစ်စကားပြောမိ
တွယ်မက်မိသော
နေရာဟောင်းသို့
ခဏရောက်ဖြစ်
အလွမ်းတွေပြည့်
အဆွေးချည့်ကျန်သည်
သခင်သက်ထားသိစေချင်........

မမုန်းသေးပါ
တွင်တွင်မြတ်နိုး
ဆိုစကားတွေ
ထိန်းခဲ့ဖူးသော
သမာဓိသိက္ခာ
အလယ်မှာ
ပန်းတစ်ကုံးသာခြားကာ
အိပ်စက်ခဲ့ကြတဲ့
ဘန်ကောက်ညရဲ့
သစ္စာတရားသည်
အတွေးဝယ်ရိပ်ရိပ်ထင်.....

အမှတ်မထင်
ခေါ်သံကြားမှာ
လှိုက်ကနဲဝမ်းသာ
သို့သော်ငြားလေ
တို့တတွေသည်
ဝေးခဲ့ပြီလေ
အမှတ်ရမိ
သတိရှိစွာ
ရင်မှာလွမ်းမော
တမ်းတမိယုံမှတစ်ပါး........

ခက်ခဲနေ့ရက်များ
ဖြတ်ကျော်ခဲ့ပြီးပြီပဲ
ဘယ်လိုနေမလဲ
ဆက်မတွေးပါ
မျှော်လင့်ခြင်းများစွာ
မထားတော့ပါ
ရင်မှာသာ
အလွမ်းစကားအဖြစ်
တမ်းတယင်းကျန်ရစ်......။     ။