အပြာရောင်မီးခြစ်တစ်လုံးရဲ့ဒဏ္ဍာရီ

ခါတိုင်းနှစ်တွေ
တွေးတွေးနေကျ
ရေးနေကျပဲ
ဒီနှစ်ထဲမှ
ဘာတွေစိတ်ကူး
ထူးမလာခဲ့
တွေးလို့မထွက်
အရေးခက်ခဲ့...........

ရေးမိပြန်သော်
ပြောခံရမည်
"မီး"ကိုမောင်လေ
တသသလို့..........

တွေးဆွေးစိတ်မှာမပြေ
ရေးရေးစိတ်မှာ
ထင်ကျန်နေခဲ့
မီး ရဲ့အရိပ်
မီး ရဲ့အသံ
မီး ရဲ့ဟန်တွေ
ပြန်မြင်ယောင်သား
အတွေးမှားသလို
ဆောင်းရဲ့အိပ်မက်
ကယောက်ကယက်လား.............

အိပ်မက်တစ္ဆေ
အရိပ်တွေအဖြစ်
ရင်ခွင်ပျက်အောင်
ချောက်လှန့်နေလား
သာယာတဲကစကားသံ
အစ်တစ်တစ်ရယ်သံ
မီး ပုံဟန်ကို
တွေးမိမြင်မက်
အိပ်မက်ထဲတွင်
မီး သာစိုးမိုး
နေရာယူ.........

Nov-Dec အိပ်မက်
ဘဝပျက်စေ
ခဏ..ခဏအခက်ပွေခဲ့
ရတက်တွေဝေလည်း
နော့(ဗ)ဒက်(ဇ) ရောက်လျှင်
အလွမ်း ပင်သည်
ရှင်သန်နိုးထ
မုန်းမရတဲ့
စိတ်လေလား
အတွေးမှားခဲ့
တကယ်သာဆို
ခါးခါးတူးတူး
မုန်းရမှာ............

Nov-Decဆိုတာ
ပေါ့ပျက်ပျက်စကားတွေ
ပြောဆိုနေကျ
လို့ ထင်ယင်မှားမလား
စိတ်ထဲမှာထင့်
သံသယဝင်
ဘယ်သောအခါမှ
မကြောင့်ကြချင်တော့
ခပ်ပေါ့ပေါ့ရယ်ဖြစ်
အတွေးသစ်မှာ
မလိုတမာ
လွမ်းတတ်တာကို
ရင်မှာမြိုသိပ်
တမင်တကာ
သိုသိပ်လည်း............

ခွဲခဲ့ရသည်
မောင့်ညရှည်ခဲ့
အတိတ်ဆိုသည်
ရင်ကိုကြေကွဲ
မနေရဲအောင်
ဒုက္ခဆောင်လို့
အနေမတတ်
နေရကျပ်လည်း
အရိပ်ပုံစံ
နှောင့်ယှက်ဟန်သည်
စိတ်ကိုအစဉ်
စိုးမိုးနှင်သလို
ချစ်ခင်စေသား
အတွေးမှားကဗျာချို
အရေးသားသာပိုလာခဲ့
ဘာမှမတွေးဘူး
ဘာထူးခြားမလဲဆိုပေမယ့်
ကဗျာဖြစ်တည်
မောင့်စိတ်ဆီတွင်
မီး သည် နက်ရှိုင်းစွာခိုဝင်
နေရာယူ...........

သစ္စာဖောက်ရက်တယ်လို့
မောင့်စိတ်ထဲရှိတဲ့
အငြိုး တရားဟာ
တကယ်တမ်းတော့
တိတ်တိတ်လေး
ခိုး ပြီးခွင့်လွှတ်တတ်ခဲ့မှန်း
မောင် ယောင်ရမ်းပြီးတောင်မှ
မသိခဲ့ရရိုး အမှန်ပါ........

လွမ်းတယ်လို့မဆိုသာပေမယ့်
တိုးတိုးတိတ်ကြိတ်လွမ်းနေခဲ့တဲ့
မောင့်ရဲ့ ရင်အစုံဟာ
နာလာယုံကလွဲပြီး
ကျန်တာ ကဗျာတွေဖြစ်တယ်
ရင်မှာနာပေမယ့်
နင်ဟာကဗျာဖြစ်တယ်
ကြင်နာခဲ့ပေမယ့်လည်း
နင်ဟာတရားခံဖြစ်တယ်
အဲလိုစွဲချက်တွေနဲ့
ကဗျာတွေအထပ်ထပ်တွေး
စာတွေဆက်စပ်ရေးခဲ့
အလွမ်းတရား
အချစ်ရဲ့သဘောတရားဟာလေ
ဘာနဲ့မှမတူ
လူကိုအူတူတူဖြစ်စေတယ်...............

ဘာပဲဖြစ်ဖြစ်ပေါ့
တချိန်က
ယုဇနပွင့်ရဲ့
ဒိုင်ယာရီမှတ်တမ်း
အလွမ်းခန်းမှာ
မှတ်တမ်းအဖြစ်
အပြာရောင်မီးခြစ်တစ်လုံးရဲ့
ဒဏ္ဍာရီတပုဒ်
လျှို့ဝှက်စွာတည်ရှိခဲ့လေရဲ့
ဒါပေမယ့်လေ
မရှိခိုးနိုး မျက်နှာမျိုးနဲ့တော့
မိုး မကြည့်နဲ့ပေါ့ကွယ်...........။ ။