တမ်းတ ၁

 အလွမ်းတွေ

အရမ်းသည်းတဲ့အခါ

ငူငူငိုင်ငိုင်

ဆိုတာထက်

အပြင်ထွက်ဖို့ကြံလည်း

သွားစရာမရှိ

ဪ....

ခက်ရချည့်

တမ်းတခြင်း

ရင်အစုံ

မင်းခုံမင်သလား

အတွေးမှာတွေ

ထွေပြားဝေ

ဘေးစကားတွေ

ဝေဝါးစေသလား

အဖြေမှားနေလား

အတွေးခက်

ဆွေးရက်ဖြေမဆည်

အလွမ်းကိုရွာတည်

ဝေးကြရလျှင်

 

မတတ်သာလို့
ခပ်ခွာခွာ
နေကြရတဲ့အခါ
ရင်မှတင်းစု
ဝေဒနာထုတည်
အလွမ်းဆီမှာ
မနေရဲလည်း
တူဆုံးဖြတ်ခြင်းက
မှားနေပြီလား
ပြန်စဉ်းစားယင်း
မျက်ရည်လည်
အခက်ပွေတယ်
အချစ်ရယ်....

နွမ်းလည်းမောလျ
စိတ္တဇတို့
တွယ်မှီခိုဝင်
စိတ်အစဉ်သည်
တောင်စဉ်ရေမရ
အတွေးများက
တဝဲဝဲလည်
အလွမ်းရယ်လို့
သမုတ်လို့မရ
နာကျင်ထိခိုက်
ကြေမွခြင်း....

ကြေကွဲခြင်း
အဖန်ဖန်ထပ်
မနေရဲခြင်းတွေ
ခြေရာမပြတ်
တမ်းတခြင်းတွေ
အထပ်ထပ်လာတဲ့အခါ
ဘဝကိုအရှုံးပေးမှ
နှလုံးအေးတော့မယ်ထင်
မဆုံရလျှင်
သေလိုကသေပါစေ
အတွေးတွေထွေ
ဖြေမဆည်မျက်ရည်များ
ရင်ခွင်ကကြေမွ
ပျက်သုဉ်းခြင်းက
အခုမှစတာလား

အိပ်ခက်ည
လွမ်းတာရှည်
ဝေဒနာများ
ထင်မှတ်မှားဆဲ
ကိုယ့်ရင်ကိုကိုယ်ညာ
မခံစားနိုင်တဲ့အခါ
သေရွာသွားချင်
မဆန်းတော့

အလွမ်းညတွေအလွန်

 

ပြန်လာမယ်တဲ့

ကြားတဲ့စကား

နားမှာမယုံ

ထင်ယောင်မှားသို့

အလွမ်းတွေနဲ့

တွေဝေနေတဲ့

နေ့ညတွေမှာ

ချစ်သူ့ထံပါး

ချွေလာမှာတမ်း

အရမ်းလွမ်းသည်

သည်လိုစကား

ခင်ကြားဖူးလိမ့်

မောင်မြင်တွေ့ဖူး

အလွမ်းဆိုသည်

ပျော်စရာမဟုတ်ကြောင်း.....

ချစ်တဲ့အကြောင်း

ပြောလို့မှမကုန်

လွမ်းတဲ့အကြောင်း

ပြောမိအစုံစုံ

စိတ်အာရုံမှာ

ဂယောင်ခြောက်ခြား

အမှောင်ရယ်လို့တောင်

မမှားတော့တဲ့အဖြစ်

ပြောစရာစကားစတွေလည်းကုန်လို့

သုံးစရာစကားလုံး

မရှိတော့တဲ့အဖြစ်အထိ

ကျွမ်းလောင်ကာလွမ်းအောင်ပြုခဲ့

ခွဲခွာခြင်းဝေဒနာဟာ

အသေချာပြုစားလို့

ထိုင်နေယင်တောင်မှ

ဘာဖြစ်နေမှန်းမသိတဲ့အထိ

အလွမ်းကြားနစ်...နစ်နေခဲ့

နေယင်းထိုင်ယင်း

အာရုံမရတဲ့အဖြစ်ထိ

လွမ်းသည်ကို............

ပျော်လိုက်တာကွယ်

ကြိုတင်ပျော်ရင်း

မြူးတူးရွှင်ပျ

(အလွမ်းညတွေအလွန်လို့တောင်မှ)

စာဖွဲ့ယင်

သာဓကရယ်ထင်မယ်ကွယ်

မြူးတူးရွှင်ပျော်

ငယ်စဉ်က ကလေးအလား

သဏ္ဍန်သရုပ်

ဟန်လုပ်မဖြစ်

ကြည်နူးပျော်မြူး

ငိုချင်ချင်ဆိုတဲ့ရင်ခွင်

ချက်ခြင်းကြည်လင်

ချစ်သူ့အသံကို

နားနဲ့ဆတ်ဆတ်

ကြားရတဲ့မှာတမ်း

အလွမ်းကြားမှာ

မပျော်ရတဲ့အတွက်

အနမ်းများစွာနဲ့

တမ်းတခြင်းတွေဖြေသိမ့်

မောင့်ရင်ခွင်မှာ

မှေးမှိတ်လှည့်တော့

တမ်းတခြင်းတွေ

ဟိုအဝေးဆီသွား

နေ့နေ့ညည

အိပ်မရတဲ့အဖြစ်တွေ

ကုန်ဆုံးလွန်မြောက်လို့

ပျော်စရာကမ္ဘာအသစ်

တည်ဖြစ်လိမ့်မယ်.........

ချစ်သူမောင်

သိပ်ချစ်တယ်ကောင်မလေးရေ

 ပြန်တွေးယင်

အရမ်းချစ်တာပေါ့

ကောင်မလေးရဲ့

လွန်ခဲ့တဲ့နှစ်နှစ်ဆယ်

မင်းမျက်နှာလေးကို

တသသ ကြည့်မြင်ရယင်

ပျော်နေတာပဲ

ညနက်သန်းခေါင်လည်း

စိတ်မပျက်ပဲ

စောင့်မျှော်ဆဲလေ

အလုပ်ကအပြန်

Ferry ကားအလာ

မင်းလာရာလမ်းဆီ......မျှော်ငေး

အတွေးတွေက

အပြစ်ဖြစ်မလား

မဆိုသာပေမယ့်

မင်းကိုချစ်တဲ့အကြောင်း

မဖွင့်ဟဖြစ်တာ

နေရတာလည်း

ပျော်ပါတယ်လို့

ပြောရမလား.........

ပြန်တွေးယင်

သိပ်လွမ်းတာပေါ့

ကောင်မလေးရဲ့

အတိတ်အရိပ်တွေ

ပြန်ပြီးတွေးယင်

ရီဝေဝိုးဝါး

အတူတူလက်ဆုံ

စားဖြစ်ခဲ့တဲ့ထမင်းဝိုင်းလေးများစွာ

သစ္စာစောင့်သိပြီး

မေတ္တာကြောင့်

အပြစ်ဖြစ်မယ်မထင်ခဲ့

အချစ်စစ်စစ်ရဲ့

အနှစ်လား..........

ပြန်တွေးယင်

သိပ်ချစ်ခဲ့တာပေါ့

ကောင်မလေးရဲ့

မင်းရဲ့ .........

အစ်ကိုလိုတစ်မျိုး

တိုးတိုးချွဲတဲ့

စကားသံတွေအောက်မှာ

သာယာစွာ

စီးမြောနစ်မြုပ်

ဘယ်ကိုသွားသွား

ဘာပဲလုပ်လုပ်

ညည်းလေးသဘောပါ

ဘဝမှာအတူတူ

သံယောဇဉ်အနှစ်များနဲ့

မျဉ်းပြိုင်နှစ်ကြောင်းလို

ဖြတ်သန်းခဲ့

ဘယ်လိုတွေးတွေး

ဘယ်လိုပဲမေးမေး

ပျော်ခဲ့တယ်.............

ပြန်တွေးယင်

သိပ်ချစ်တာပေါ့

ကောင်မလေးတစ်ဖြစ်လဲ

မောင့်အချစ်ရယ်

မျဉ်းပြိုင်နှစ်ကြောင်းဟာ

အင်ဖနတီမှာဆုံသတဲ့

သိပ်ချစ်ပြီးတွယ်တာ

မြတ်နိုးခြင်းများစွာ

ရင်မှာနှောင်တွယ်

သိပ်ချစ်တဲ့အကြောင်း

အတူတူဆုံဖြစ်ကြတဲ့အချိန်

နှစ်ကိုယ်တူအချစ်တွေနဲ့

အလိုတူချစ်ခဲ့

တမ်းတမိတယ်ချစ်ရယ်

အချိန်တိုင်း

အိမ်ရှေ့နဲ့နောက်ဖေးတောင်လွမ်းတယ်

အရမ်းချစ်တယ်

မောင့်ချစ်သူ

ကောင်မလေးရဲ့..........

ပြန်တွေးယင်

အရမ်းချစ်တာပေါ့

ကောင်မလေးရဲ့

ခုအသက်အရွယ်မှာ

အဖွားကြီးဖြစ်နေပြီဆို

ခနခန မပြောပါနဲ့

အချစ်ဆိုတာ

အသက်အရွယ်နဲ့

လားလားမှမဆိုင်လေ

ချစ်တဲ့အချစ်မှာ

ကောင်မလေးဆိုတာ

ဘယ်တော့မှအိုမင်းသွားမှာမဟုတ်လို့

အမြဲနုပျိုဆဲသဏ္ဍန်မြင်

သိပ်ချစ်ခဲ့တာဆို

ဘယ်လောက်ထိ

မြတ်နိုးခဲ့လဲဆို

အသွင်သဏ္ဍန်မပါပဲ

ညည်းဟာကိုယ့်အတွက်

ထာဝရအပျိုစင်အဖြစ်

နှလုံးသားတစ်ခုလုံး

စိုးမိုးကိုင်ဆုပ်

ထိန်းချုပ်နိုင်တာ

မသိလေရော့သလားကွယ်.........

ချစ်တာယ္ခု

 

လွမ်းတယ်သခင်
တမ်းတစဉ်မှာ
ရင်မှာကျွမ်းလောင်
မျက်ရည်ဖောင်ကျ
နွမ်းလျလျနှင့်
သီဝေ့ခိုတွယ်
နာကျင်တယ်လေ

ကြေကြေကွဲကွဲ
ရင်ထဲငိုရှိုက်
အလွမ်းမိုက်သည်
သည်းခြေပျက်မျှ
ကြေမွကြေကွဲ
ငိုပွဲဖွဲ့နေ
ချစ်သူရေလို့
တမ်းတမ်းတတ
နွမ်းလျကာလျှင်
အသည်းကြေကွဲ
ငိုပွဲဖွဲ့

ငိုတယ်သခင်
ဝေးသွားသည့်နေ့
အလွမ်းပြည့်လျက်
ကျွမ်းကျွမ်းလောင်လောင်
တမ်းတအောင်ပြု
နွမ်းလျရင်စု
သူပြုသမျှ
ရူးနေကျပဲ

မေတ္တာထု

ကြာပြီလေ

နှစ်ပေါင်းနှစ်ဆယ်ကျော်ယွန်းပေါ့

ရင်ထဲမှာ

တမြတ်တနိုး

ထုပ်ပိုးသိမ်းဆည်းထားတဲ့

နှလုံးသားအတွင်းက

မောင့်အချစ်ဆုံးရေ

ချစ်တေးတွေဆိုခဲ့

တိမ်တွေကိုဖြတ်ကျော်

ခရီးနှင်ခဲ့တာ

မနေ့ကများလား

ခနလေးထင်ပေမယ့်

ဆယ်နှစ်ကျော်နှစ်နှစ်စွန်းခဲ့

တမ်းတမိတာအခါခါ

ထပ်တူအချစ်များနဲ့

ဖြတ်သန်းလာခဲ့တာ

တစ်သားတည်းတောင်ဖြစ်ပေါ့

သိပ်ချစ်တယ်ကွယ် ။

ဇတ်လမ်းတစ်ပုဒ်မှာ

မင်းသာနဲ့မင်းသမီးပေါင်းယင်

ဇတ်သိမ်းလို့ဆိုကြ

ဇတ်သိမ်းခန်းရဲ့အခြားဖက်ကို

ဘယ်သူမြင်

ဘယ်သူသိ

ဘယ်သူရှိမလဲနော်

ချစ်ခြင်းတွေက

ကြေကွဲစရာဖြစ်လာတဲ့အခါ

ကန္နရီချောင်းခြား

ကဇတ်က 

တစ်ခန်းရပ်မဟုတ်သလိုပါ

သူတို့က

တစ်ညဝေးလို့

ရက်ပေါင်းခုနစ်ရာငိုကြွေးကြယင်

မောင်တို့တွေ

တစ်ဘဝစာဝေးပြီလို့

ဘယ်လောက်ငိုကြွေးရမလဲ ။

တမ်းတတယ်ကွယ်

သိပ်ချစ်တာတစ်ဘဝစာမို့

နောင်ဘဝဆိုတာရှိမှာလေလား

ပြည်မှာဆောင်းအစချီ

ပြိုင်တူသီဆိုခဲ့တဲ့

ရိုးတစ်လျှောက်ကသံစဉ်တွေ

လွင့်မပြယ်ခင်

ကံဇတ်ဆရာကအငြိုးထား

မိဘများဆိုတဲ့စကားလုံးဖြစ်တည်မှုက

ချစ်သူတွေကိုဝေးစေသလား။

အတွေးတွေများစွာထဲ

မျက်ဝန်းမှာခိုသီ

မျက်ရည်ကြည်ဝေ့

ငိုတဲ့နေ့တွေ

ရှည်လျားထွေပြား

နေတတ်သွားချိန်အထိက

ဘယ်လောက်ကြာမှာပါလဲ

လက်ကျန်ဘဝ

တခုလုံးများလား။

တမ်းတငိုကြွေး

နေရေးခက်ပြီ

နေ့ရက်တိုင်းမှာ

ချစ်သူနှင့်သာ

ဖြတ်သန်းနေခဲ့

နှစ်လများစွာကြာလာပြီးမှ

ရုတ်တရက်ဝေးကွာ

ခွဲခွာကြလျှင်

မငိုပဲလျှင်ဘယ်သို့ရှိ ။

သစ္စာပြု

 လွမ်းသည်ဟုဆိုရာဝယ်

ဆုံစည်းခြင်းမရှိနိုင်သော

ဘဝတို့၏သံယောဇဉ်ရေစက်များ၏

ဝဋ်ကြွေးအဖြစ်သို့

သက်ရောက်လာသည့်အခါ

ရင်သည်.........

ကြေကွဲခြင်း

လွမ်းဆွတ်ခြင်း

တမ်းတခြင်းသာ

ထီးထီးကျန်ရစ်လေ၏ ။

နာကျင်ခြင်းရင်အစုံ

နှလုံးသားရှိသည့်ဖက်အခြမ်းဟု

ဆိုအပ်သောဘယ်ဖက်ရင်အုံသည်

ကြေမွခြင်းကိုမမြင်ရသော်ငြား

နာကျင်စွာတဆတ်ဆတ်တုန်ကာ

တစ်သားတည်းဖြစ်ခဲ့ဖူးသည့်

ချစ်သောသူ၏ ပုံရိပ်လွှာသည်

ကျောက်ထက်ကမ္ဗည်းထိုးသကဲ့သို့

ထင်ကျန်၏ ။

နာကျင်စွာပင်

တမ်းတငိုကြွေးပါသော်ငြား

ကူရာကယ်ရာမဲ့နေခြင်းအတွက်

နာကျင်ကြေမွကြေကွဲစွာ

တမ်းတခြင်းအတွက်

တစ်‌ဦး၏ရင်အစုံကို

တဦးကနားလည်ခြင်းငှာ

ငါသည်

ချစ်သူတိုင်တည်ရာစကားများကို

နားထောင်လျှက်ဖြေသိမ့်‌ပေးနိုင်သူဖြစ်အံ့

ထို့အတူ ချစ်သူသည်လည်း

ငါ၏တိုင်တည်ရာစကားများကို

နားထောင်လျှက်ဖြေသိမ့်ပေးနိုင်သူ

ဖြစ်ပါစေသား ။