ဘလော့ဂါတွေပြောတဲ့ပုံပြင်

ဘာမှမပြောချင်ပါဘူး
ချစ်တတ်တဲ့
စိတ်လေးတစ်ခုတည်းနဲ့
မနေ့ကစပယ်ပွင့်ပေမယ့်
ဒီနေ့မှာမပွင့်တော့
မနေ့က
နှင်းဆီပွင့်ဖတ်တွေကြွေတော့
ဒီနေ့ နှင်းဆီတစ်ဖူး
သူခူးလာခဲ့
ဘာပဲဖြစ်ဖြစ်
ငါတို့ပျံသန်းခြင်းတွေအတွက်
မနက်ဖြန်ဆိုတာရှိရမယ်
မနက်ဖန် မရှိဘူးဆိုယင်တောင်မှ
ငါတို့ပျံသန်းခြင်းတွေက
အလကားတော့မဖြစ်ပါဘူး
စကားလုံးတွေနဲ့
ကုတ်ခြစ်ခဲ့ကြ
ကြမ်းရှရှ ပင့်ကူအိမ်စာမျက်နှာ
ဟိုမှာအဖော်တစ်သင်း
ဒီမှာသူငယ်ချင်းတွေ.....
ဝေးမြေခြားလည်း
နီးနေကြဆဲပေါ့.........

ဘာပဲဖြစ်ဖြစ်ပေါ့
ငါတို့တွေဆက်ပြီး
ပျံသန်းကြ
ကုတ်ခြစ်ကြမယ်
လေဟုန်ကိုခွဲလို့
ပရော့ဆီတွေကျော်လို့
မရရတဲ့နည်းနဲ့
သမိုင်းအဖြစ်ကုတ်ခြစ်ယင်းနဲ့
ဒါဏ်ရာရတဲ့သူကရလို့
နာကျင်နေတဲ့သူတွေကနာကျင်လို့
ခရီးအတွင်တွင်ထွက်ကြ
ဤခရီးနီးသလားဆိုပြီး
လှမ်းခဲ့ကြ
ဘာလိုလိုနဲ့နှစ်ပေါင်း
များခဲ့ပြီပဲ..........

မနက်ဖန်မိုးမရွာလဲ
ငါကျေနပ်ပါတယ်
မနက်ဖန် မီးမလာလဲ
ငါကျေနပ်ပါတယ်
မနက်ဖန်..ကွန်နက်ရှင်နှေး........လဲ
ငါကျေနပ်ပါတယ်
မနက်ဖန်........             ..........လဲ
ငါကျေနပ်ပါတယ်
ဘာပဲဖြစ်ဖြစ်
အခန်းထဲလှောင်ပိတ်မထားကြပါနဲ့
မွန်းတတ်လို့ပါ
ဒါပေမယ့်
ဒီအခန်းထက်ကျယ်တဲ့နယ်ပယ်
ဘယ်မှာရှိဦးမလဲ
ဘာပဲဖြစ်ဖြစ်
ငါတို့ကဖားသူငယ်တွေပါ......။     ။

သက်တန့်ဖျားကငှက်ကလေးသို့(၆)

သင်းကြည်ချိုမြ
နှင်းဆီလိုလှတဲ့မေ
အပြုံးတွေဝေ
ရင်မှာလေလှိုက်မော
ချစ်မိသောဘဝမှာ
ရင်ရဲ့တခွင်တပြင်မှာ
ညည်းသာပိုင်စိုး
အနိုင်နဲ့ပဲမိုးရော့......

ခပ်လှုပ်လှုပ်ပါကွယ်
မခုန်တတ်တော့တဲ့ရင်
မင်းအသွင်တွေ့တော့မှ
ထပ်တူညီမြဲ
ရယ်ပွဲဖွဲ့ဖြစ်တဲ့
နေ့ညတွေလေ
အမှတ်တရရှိဆဲ
ထင်ရစ်ခဲ့ဘူးသော
ရင်ကခြေရာ
အမှတ်မှားခြင်းတော့
မဟုတ်စေနဲ့ပေါ့ကွယ်........

တခုတ်တရကဗျာ
စာလွှာတွေတွေး
နှလုံးသားရေးလား
ထင်မှတ်မှားယုံပဲလေ
စိတ်ဖြေသာယုံ
ကျေနပ်ယုံမျှ
နှစ်သိမ့်မှုသာ
ပေးသနားလျှင်
နေပျော်ပြီထင်
ငှက်အသွင်တောင်ပံဖြန့်လို့
ငါ့ရင်ခွင်နားခိုလှည့်ပါ
မဆိုသာသောဘဝ
ရင်ခွင်ထဲကညတွေ
တွေးမိတိုင်းလျှင်
ဘဝင်ကြည်နူး
နေဖူးချင်ရဲ့.........

သက်တန့်ရောင်ဝါ
ရင်မှာရိုက်ခတ်
နွေလည်မိုးမှ
မြင်တွေ့တတ်သော
ပုံရိပ်ရောင်ဝါ
လင်းဖြာရောင်စဉ်
မြင်လျှင်ကြိုးညှိ
တီးခတ်မိချင်
ရင်သိသံစဉ်
ချိုချင်ပါရဲ့
ညည်း မိလေသော
ကာရံနဘေထပ်တွေ
သံစဉ်သွတ်သွင်း
သီချင်းဖြစ်စေ
မင်းတွက်ပေမို့........

ရောင်စဉ်ဖြာလက်သော
ကမ်းလက်တို့
တွန့်မဆုတ်မီကြား
သခင့်ထံပါး
အခစားရောက်ချင်
တွေဝေသော
မက်မောတပ်မက်မှု
မှုန်ဝါးလေသော
ပိုင်ဆိုင်တဲ့ညများ
မာယာဖြူနဲ့
ညှို့ယူဖမ်းစားခြင်း
အတတ်ပညာ
ရင်မှာအနေထိုင်
မတတ်ခြင်းများ
နေရာယူရယ်ပွဲဖွဲ့
တတ်လေသော
ငြူစူစောင်းမြောင်း
ပြောဆိုတတ်လေသော
အငိုလွယ်လျှက်
အရှိုက်ခက်သော
အလှမ်းဝေးလွန်းလှသော
ပန်းကလေးသာ
ဖြစ်နေပါတော့
မောင့်သခင်...........။     ။

စွန့်လွှတ်ထားလျှက်တပ်မက်မိသော

ဘဝဆိုတာ
နေပျော်ပါတယ်
တွယ်တာတမ်းမက်
လွမ်းရက်တွေ
မရှိယင်တောင်မှ
နွမ်းလျက်ဖြေစရာ
အတွေးတွေနဲ့
ကမ်းလက်တွေ
သေချာခဲ့သဘောဟာ
ပြောပြလို့ကုန်ဖွယ်မရှိပါပြီ.........

တစ်ကယ်တော့
အလွမ်းနဲ့ဝေး
ကမ်းဝေးလှေလို
လေနှင်ရာလွင့်
တမ်းတခြင်းတိမ်တွေလည်း
မိုးအဖြစ်နဲ့မရွာဖြစ်ခဲ့
တွေးငေးနေတဲ့ဘဝ
မလိုချင်လှပါ
တစ်ကယ်ဆို.....
အလွမ်းဆိုတာကောင်းရဲ့လား..........

မကောင်းမှန်းသိ
ထိတိုင်းငြိနေ
တွေဝေစွာပင်
အလွမ်းကြားနစ်ပေါ့
ပြောသည့်စိတ်တိုင်
ခပ်ယိုင်ယိုင်ပဲ
မလွမ်းပဲနေကြည့်
နေချင်သေးတယ်........

မလွမ်းပေမယ့်
တစ်ခုခုကို
တမ်းတတ်တာ
သဘာဝလား
အတွေးမှားတွေနဲ့
ဘေးစကားလည်းမယုံချင်
အသွေးသားထဲမှ
ကြုံတယ်ထင်တယ်
အလွမ်းဆိုတာ
ခါးသက်ချိုမြိန်နေလည်း
ဘိန်းလိုပဲစွဲ......။     ။

အချစ်တွေဝေ

ချစ်သူရေ
ပျော်မောဖွယ်နေ့
ရက်တွေအတွက်
ထာဝရလို့မှတ်ယူပြီး
တစ်ခဏကို
တစ်ဘဝစာအဖြစ်တွေးတော
ငေးမောပြီးနေချင်သေးတယ်
မင်းရဲ့နံဘေးမှာ
လက်ချင်းကိုင်ဆုပ်
မျက်နှာမွန်ဦး
ငုံ့ကြည့်စဉ်ခဏ
ထာဝရပါပဲကွယ်.........

ချစ်သူရေ
တဒင်္ဂတဲ့လား
ခင့်အနားမှာ
တဖဝါးမကွာ
ခွဲလျက်ခွာစွန့်
ဝေးသွားဖို့မဝံ့ပါကွယ်
တွေးမိယုံနဲ့ရင်က
လောင်မြိုက်ကျွမ်းဝေဒနာ
ဖြေဆည်နေရာမရှိပါချေ........

ချစ်သူရေ
အမှားတွေဝေးဖို့
တွေးဆင်ခြင်
ချစ်မိယင်မညာတမ်းပါကွယ်
ရင်ထဲမှာလှိုက်မော
ကိုယ့်ရဲ့ချစ်ခြင်းက
အပြစ်ကင်းချင်တယ်
ကိုယ့်ရဲ့ဆံပင်ဖျားလေးတွေကအစ
မင်းကိုချစ်တယ်ဆိုယင်
လွန်နေမယ်ထင်လား
ခင်ရေသက်ထားအဝေးမသွားနဲ့
နေပါစိတ်ထဲ
နှလုံးအိမ်ထဲမှာ........

ချစ်သူရေ
အရိမေယျတ္တဘုရားရှင်
ပွင့်တော်မူတဲ့အခါမှ
ကျွတ်တမ်းဝင်မဲ့သူတွေထဲမှာ
ပါခဲ့ယင်လေ
သံသရာကျင်လည်ရာတစ်လျောက်
မကွဲမကွာမခွဲမခွာ
နှစ်ကိုယ်တူယှဉ်
ချစ်ကြင်နေချင်ပါရဲ့ကွယ်.......