မန္တလေးအမှတ်တရ

မန္တလေးကိုမရောက်ဖြစ်တာ
တော်တော်ကြာခဲ့ပေါ့
အတော်ပြောင်းလဲသွားတဲ့မြို့
မနေ့ကတွေ့လိုက်ရလို့
အတော်အံဩခဲ့........
တချိန်ကမိုးတွင်းမှာတောင်
မိုးရွာဖို့တော်တော်ခက်တဲ့မြို့ဟာ
မိုးကောင်းကောင်းရွာတာ
လမ်းပေါ်မှာရေလျှံခဲ့
ဆိုင်ကယ်အိတ်ဇော
မမြုပ်ယုံသာ.........
တစ်ခုဆိုးတာက
ဘီယာဆိုင်တွေပေါသလို
အဖြူဆိုင်တွေလည်းတိုးပွားလာခဲ့
ညအလင်းဆိုင်မှတ်လို့
ဝင်ထိုင်မိကာမှ
အဖြူဆိုင်မှန်းသိတော့
ပြန်လှည့်ခဲ့ရ.........

မရောက်ဖြစ်တဲ့
ဆယ့်ငါးနှစ်အတွင်း
အဲ့ဒီတုန်းက
ချီပိုးထိန်းကျောင်းခဲ့ဖူးတဲ့
မီးငယ်လေးတောင်မှ
အပျိုကြီးဖားဖားဖြစ်နေခဲ့ပေါ့
မန္တလေးဟာ
အဲ့ဒီမီးငယ်လေးနဲ့အတူ
အရွယ်ရောက်ခဲ့
ဒါမှမဟုတ်
ငါ့ရဲ့မီးငယ်လေးကပဲ
မန္တလေးနဲ့အတူ
အရွယ်ရောက်ခဲ့သလားပဲ
ဘူတာကြီးကတော့
ဆေးအသစ်ကို
သနပ်ခါးလူးထားသလိုလူးပြီး
သစ်ချင်ယောင်ဆောင်နေခဲ့တာ........

ဒါပေမယ့်....
ဟိုးအယင်တုန်းကလိုပဲ
စက်ဘီးတွေအစား
တရုတ်ဆိုင်ကယ်နဲ့
မြင်းလှည်းအစား
ဆိုင်ကယ်ကယ်ရီတွေလည်း
ပေါမှပေါ
လွန်ခဲ့တဲ့ဆယ့်ငါးနှစ်က
မြိူ့ကျဉ်းလေးက
အရှေ့အနောက်
တောင်မြောက်ချဲ့ကားပြီး
အတော့ကိုကျယ်ဝန်းလာခဲ့
ဒါနဲ့..မျက်စေ့လည်နေတုန်း
မီးငယ်လေးကမေးတယ်
ဦးဦး အန်တီ မီးမီးရောတဲ့..လေ
ငါမှင်တက်မိနေခဲ့.........
ကဲ ငါဘာပြန်ဖြေရမလဲ
မန္တလေးကိုပဲမေးရမလား
မီးမီးကိုပဲမေးရမလား
တွေးရခက်နေတုန်းပဲ......

မကြုံဖူးတဲ့မန္တလေးရဲ့
ရာသီဥတုနဲ့ကြုံခဲ့ရပြီး
အိပ်မက်သလို
မျက်လုံးထဲပေါ်လာတဲ့
နန်းဆန်တဲ့ဤမြို့လေ......

--
ချစ်သူမောင်

တိတ်တခိုးတွယ်တာ

ကဲ ....
သခင်လို့တင်စား
ရင်မှာထားတဲ့
မောင့်..အချစ်ရေ
စိတ်အာရုံထွေပြား
သတိရနေစဉ်ခိုက်
စိုးမိုးလိုက်လေ
နွဲ့ နွဲ့သံချိုက
ရင်ကိုသပ်လျှို
လိုက်သလိုပဲ
စူးစူးနစ်နစ်နဲ့
ရူးပြီးချစ်တဲ့အချစ်က
ပူစေတယ်.....
အစတည်းက
အမှားနဲ့စခဲ့
ဘဝရဲ့
ရက်အပိုင်းခြားတွေ
ရွေ့လျားကာအမြန်ကုန်ခဲ့
သင်္ချာတစ်ပုဒ်လို
အမှားနှစ်ခါထပ်လို့
အမှန်ဖြစ်ချင်ပေမယ့်
သံသရာနယ်မှာ
အပြန်တစ်ရာမက
ကျင်လည်ချင်ခဲ့လည်း
အမှန်သာဆိုယင်
တို့တို့ချင်းသာ
ဆုံတွေ့ခြင်းဖြစ်စဉ်
မရှိရမှာ........

ကွယ်ရာမှာတော့
လွမ်းနေချင်တယ်
မလွမ်းသင့်မှန်း
ရင်ခွင်နန်းက
အသိသားလေ
မတွေမဝေ
ရင်ခွင်က
ချစ်ခြင်းကိုပေးဆပ်
နှင်းအပ်ခဲ့စဉ်က
မင်းပါးပြင်ထက်မှာ
ချွေခဲ့တဲ့အနမ်း
အတုယောင်မဟုတ်မှန်း
သိပါစေ.......

စွဲလန်းတမ်းမက်
ရင်ကအငွေ့အသက်
တစ်ချက်တစ်ချက်
တွေးမိလိုက်တိုင်း
နွေးကနဲလှိုက်ဖို
သောကတွေပဲ
ပိုလာသလို
မောလျခြင်းဝေဒနာ
ခံစားရခက်
မဖြေသာနေ့ရက်များမှာ
မနေသာညနက်နက်မှာ
မင်းကိုတမ်းတ
အလွမ်းညတွေ
ရှည်ခဲ့ပါ၏.......

သတိတရ
တမ်းတတိုင်းလေ
မှိုင်းမှုန်ဝေတဲ့
စိတ်အစဉ်
သခင်သာလျှင်
ပိုင်စားစိုးမိုး
အဝေးကနေရတဲ့
သခင့်ဓါတ်ပုံတွေ
အမှတ်တရအဖြစ်
ငေးကြည့်ပါရစေ
အဝေးတိတ်တခိုး
မြတ်နိုးစိတ်လေးနဲ့
တိတ်တိတ်ကလေးပဲ
တွယ်တာလို့သာ
နေပါရစေ.......... ။ ။

--
ချစ်သူမောင်